Styrkjum úthlutað til þýðinga á íslenskum leikverkum 2025
Fagráð Sviðslistamiðstöðvar Íslands hefur lokið yfirferð umsókna um þýðingarstyrki sem auglýstir voru 19. febrúar 2025, með umsóknarfresti til 19. mars. Alls bárust 11 umsóknir og var ljóst að áhuginn á því að koma íslenskum leikverkum á framfæri á alþjóðavettvangi er mikill og metnaður umsækjenda til fyrirmyndar.
Styrkir eru veittir til þýðinga á frumsömdum íslenskum leikverkum yfir á önnur tungumál. Markmið styrkjanna er að auka sýnileika og eftirspurn eftir íslenskum leikverkum erlendis, hvort sem um ræðir sýningar, útgáfu eða kynningu á erlendum vettvangi.
Í ár var ákveðið að veita styrki til þriggja verkefna samtal 650 þúsund krónur.
Styrk hljóta eftirfarandi verkefni:
• „Sjö ævintýri um skömm“ eftir Tyrfing Tyrfingsson í þýðingu Marie Sophie Besson á frönsku. Verkið verður gefið út í bókaformi hjá Maison d’Europe et d’Orient (l’Espace d’un instant) í Frakklandi.
• Styrkupphæð: 250.000 kr.
• „Heim“ eftir Hrafnhildi Hagalín Guðmundsdóttur í þýðingu Brian FitzGibbon á ensku. Leiklestrar eru fyrirhugaðir í sendiráðum Íslands í Berlín, Osló og Helsinki. Þýðingunni verður dreift af Nordiska ApS.
• Styrkupphæð: 250.000 kr.
• „Árið án sumars“ eftir Marmarabörn í þýðingu Sögu Kjerúlf Sigurðardóttur á ensku. Verkið verður sýnt í Rosendal Teater í Noregi árið 2026, og kynningar fara fram í samstarfi við Reykjavík Dance Festival.
• Styrkupphæð: 150.000 kr.
Fagráðið þakkar kærlega fyrir fjölbreyttar og vandaðar umsóknir. Næsta úthlutun verður auglýst síðar á árinu.
